Du darrain jour de février l’an mil v° et seize, pardevant sire Jehan Hulland, prévost, comparurent Bonaventure de Thieffries, pointre, demourant au Monchiel en ceste ville, d'une part, et maistre Jehan Piccart, prestre chappelain de l’ospital de Marvis, ou nom et comme procureur et recepveur des Dames dudit lieu, d’autre part; et recongnurent, de leurs bonnes volontéz sans constrainte, avoir marchandé ensemble, meismement ledit Bonaventure, de poindre, dorer et acoustrer une table d’autel de l'istoire de la Passion Nostre-Seigneur Jésu-Crist, et une cibolle dessus estant oudit hospital, selon les devises et conditions au long mentionnées en une fœuille de pappier qu'ils exhibèrent pardevant ledit prévost, et fust lecture en hault et publicque en leurs présences, contenant la teneur qui s’ensuit. — S’ensuit une devise pour poindre et dorer une table d’autel et une cibolle séant sur la table. Premièrement, le bas de ladite table sera doré de lin or brunty, réservé le creu tout autour sera de bon asur, et les rosettes dedena le creu seront de fin or brunty ; et le can de dehors contre sera de bon noir à olle; et le voye qui est embas au piét sera tout doré de tin or brunty si faire se peult, ou sinon sera doré de fin or à olle et rencontré par derrière de bon asur souffisant à l'ouvraige ; et le gros dudit piet sera de jaspre à olle et bien verny. Item, pour les cincq gratis parqueaulx, qui sont dedens ladite table, tous les personnaiges grans ou petis seront tous doréz de fin or brunty, c’est assavoir manteaux, robes et autres acoustremens qui seront de drap d’or brunty, figuréz de bon asur et de bon sinoppre de Coullongne ; et les onneurs des habillemens seront doréz de fin or brunty et pardessus de bon asur, et tous de belles fleurs et autres meignosités ; et pardessus les habillemens seront de belles lisières et bordures de pluiseurs manières, et de belles fleurs faites d’aluminures pour enrichir l'ouvraige et le faire plus sumptueulx ; et aussy les visaiges des personnaiges seront estofféz de pluiseurs sortes de carnation, chacun personnaige selon les contenances qu’ils sont; et seront tous faits de bonne et lëalle coulleur, comme l'ouvre le requiert et demande. Pour la machonnerie ; et premiers, toute la machonnerie de la table, par dedens, sera toute dorée de fin or brunty ; et ce qui ne se porra bonnement bruntir, le menue taille, sera tout doré de fin or à olle; et les six gros pilliers de devant entre les parqueaulx seront tout doréz de fin or brunty ; et les vossures qui sont dessus la machonnerie, les croisures seront tout doréz de fin or, et le reste de bon azur plain d'estoilles de fin or; et derrière les grans parqueaulx, la menue taille rencontrée de bon asur. Item, pour la cibolle qui est sur ladite table, tous les pilliers, crestes et arboutans seront tous doréz de fin or brunty ; et toute la menue taille sera aussy pareillement toute dorée de Un or à oille ; et la vossure et les espis des pilliers et le creu seront de bon azur; et n’y aura rien en ladite cibolle que bon or et bon azur à tout ce qu’on peult perchevoir devant et des deux costéz. Item, toutes les terrées que appartiennent estre verds, comme le Mont de Calvaire et là où Nostre Seigneur porta la croix tous les cailleàulx seront tous doréz d’or fin brunty, et les haulteurs des terres seront de fin or mat, et le reste glacié de verd à olle ; et les trois croix qui sont au Cruchifiement seront toutes dorées de fin or et brunty ; et Nostre Seigneur sera estoffé de morte coulleur, comme il appartient, et les larrons estofféz comme l'euvre le demande et requiert. Pour les foeillets : item pour le premier fœillet, pardedens, l’istoire là où Nostre Seigneur fait ses prières au Gardin d’Ollivier à Dieu le Père; item, les bordures des fœillets, par dedens, tous les trois doréz de fin or brunty, et sera le plat en dehors œuvré de noir à olle ; item, ou deuxiesme, sera fait la prinse de Nostre Seigneur, et comment Judas le baisa et le trahit; ou troisiesme, la Résurection de Nostre Seigneur, et en pays esloigné comment il alla rompre les portes d'enfer; et ou quatriesme et derrenier, sera fait comment Nostre Seigneur monta au chiel, délaissa sa mère et ses apostres. Par dehors : item, par dehors seront fais quatre ymaiges, est assavoir ; Saint Lyon et ung priant d'après le vif; l’autre ensuivant, Nostre Dame en son trosne; l'autre ensuivant, Saint Bonaventure ; et le derrenière, Marie-Magdelaine; bien pourtrais et bien richement acoustréz comme l’euvre le requiert et demande. Et sera tout cest ouvraige, qui est cy-dessus devises, bien fait et bien ouvré selon lesdites devises, et sans fraulde nulle, par dict d’ouvriers ad ce cognoissans, aux despens du tort. Ledit marchié fait pour le prix et somme de unze livres de gros, que ledit maistre Jehan le Piccart, oudit nom, ou autre de par ledit hospital, a prommis et sera tenu de payer comme il s’ensuit, c'est assavoir : les six livres de gros, incontinent que ledit Bonaventure de Thieffries commenchera à dorer oudit ouvraige ; et les autres cincq livres de gros, quanti cellui Bonaventure aura parfait ledit ouvraige. Lequel ouvraige ledit Bonaventure a promis livrer parfait et parachevé selon les devises dessusdites, endedens le jour de le Procession de ceste ville prochain venant, qui sera l’an mil vc et dix sept, ou plus tost si faire se peult. Proumettant chacune desdites parties, chacun en droit soy, entretenir, furnir et accomplir les devises dessusdites et chacune d’icelles ; et ad ce se sont obligiéz.